Woans geiht dat wieder mit dat Institut för nedderdüütsche Spraak?

Lütte Anfraag vun de Frakschoon vun de FDP.

 Siet 1979 kriggt dat Institut för nedderdüütsche Spraak, dat in Bremen to Huus is, Fördergeld vun de Länner Schleswig-Holsteen, Hamborg, Bremen un Neddersassen. Dat hebbt de Länner in en Kuntrakt fastleggt. Siet över veertig Johr loopt bi dat Institut Fragen to all Kanten vun de plattdüütsche Spraak op. Dat Institut gifft Stütt för Scholen un Kinnergoorns, man se hölpt ok de Politik un de Wetenschaft.

De plattdüütsche Spraak is een vun de Regional- un Minnerheitenspraken in Düütschland. För de FDP-Frakschoon steiht fast: Dat is en wichtig Stück Kultur, de dat to bewohren gellt un to de vele Minschen in Noorddüütschland seggt: Ja, Plattdüütsch höört to uns Leven dorto.

An’n 10. 05. 2016 hebbt de Geldgevers dat Institut för nedderdüütsche Spraak schreven, se wüllt den Kuntrakt doröver, dat se Geld an dat Institut geevt, opkünnigen; lopen schall he blots noch bet to dat Enn vun dat Johr 2017.

Dat is de Achtergrund dorför, dat wi den Senaat fragen doot

1. Wenn dat Fördergeld na den olen Kuntrakt nich mehr kummt: Wat plaant de Senaat in Tokunft as Stütt för dat Institut för nedderdüütsche Spraak?

2. Wokeen deit wat dorför, dat Bremen tohoop mit de Länner Neddersassen, Hamborg un Schleswig-Holsteen en Förderplaan för de plattdüütsche Spraak op de Been stellt? Un wo wiet is düsse Plaan?

3. Wat deit de Senaat dorför, dat nich blots – so as bet nu – de Länner Bremen, Hamborg, Neddersassen un Schleswig-Holsteen Geld dorför geevt, dat de plattdüütsche Spraak lebennig blifft un Stütt kriggt un womööglich ok dat Institut för nedderdüütsche Spraak, man dat ok de Länner Brannenborg, Meckelnborg-Vörpommern, Nordrhein-Westfalen un Sachsen-Anhalt, de de Sprakencharta för Plattdüütsch ok ünnerschreven hebbt, dat de fraagt warrt, wat se nich jümehren Andeel leisten köönt.

4. Wat meent de Senaat: Gifft dat en Tokunft för dat Institut för nedderdüütsche Spraak un för de Mitarbeiders, de dor anstellt sünd, wenn in’t Johr 2018 de institutschonelle Förderung wegfallt?

5. Wat will de Senaat dorför op de Been stellen, dat he noch dat ümsetten kann, wat in de Sprakencharta in Deel II, Artikel 7; 1.c binnen steiht, wenn de Förderung vun dat Institut för nedderdüütsche Spraak, so as dat plaant is, an den 31. 12. 2017 utlopen deit? De Sprakencharta schrifft vör, dat de Staat sik kloor un düütlich for de Regional- oder Minnerheitenspraken insetten deit.

6. Woans regelt de Senaat dat opstunns, dat Platt op all Ebenen lehrt warrn kann? In de Charta steiht, de Senaat mutt dat passliche Handwarkstüüch un de Middel dorför insetten. Wat för en Rull speelt dat Institut för nedderdüütsche Spraak bet nu in düsse Fraag? Wat för en Plaan hett de Senaat för de Tiet vun 2018 op an?

7. Wat hett de Senaat dorför in Gang sett, dat dat in Bremen mehr plattdüütschen Spraakünnerricht an de Scholen un in Kursen för utwussen Lüüd geven kann?

 

Dr. Magnus Buhlert, Lencke Steiner un de Frakschoon vun de FDP